GOIAN BEGO, JUAN CARLOS

Aita Menni eta Monroviako Saint Benedict Menni Mental Health Center familia ospitalarioa doluz dago gaur, atzo, Juan Carlos Irizar gure We Are Like You proiektuko lehen ongileetako bat hil zelako.

Juan Carlosek 69 urterekin utzi gintuen, eta musikagilea, interpretatzailea eta abesbatza eta orkestren zuzendaria izan zen. Oñatiko musikaria Ahizpa Ospitalariak Aita Menni Ospitaleko pazienteen koruko zuzendaria zen, eta oso lotura berezia sentitzen zuen Liberian gaixotasun mentala duten emakumeei arreta emateko dugun We Are Like You proiektuarekin. Irizar izan zen, gainera, “San Benito Menni ereserkia” ren konpositorea, Ospitaleko Ahizpek Kongregazioaren ospakizun askotan abesten dutena.

2014ko ebola-epidemiak eta San Juan de Dios hiriko hainbat anaien eta Saint Joseph Catholic Ospitaleko langileen heriotzek eragin handia izan zuten berarengan, eta gertakari horietan inspiratutako hainbat pieza konposatzera eraman zuten, geroago “We Are Like You” izeneko diskoan jasoko zituenak.

Juan Carlosek bere talentu musikala gure kausa solidarioaren zerbitzura jarri nahi izan zuen, eta 2015ean kontzertu bira bat jarri zuen abian Euskal Herriko hainbat herritan, Monrovian osasun mentaleko gure ekimenerako dirua biltzeko. 

Irizar buru-belarri murgildu zen, eta dozena bat errezitaldi eman zituen Eskoriatzan, Zumaian, Zaldibarren, Arrasaten, Durangon, Aramaion, Donostian, Gernikan, Bilbon, Araian, Berrizen eta Zestoan. Kontzertu horiek berak antolatzen zituen zehatz-mehatz. Toki bakoitzean herriko edo inguruko abesbatzei laguntzen zien pianoarekin, eta, kasuren batean, baita abeslariei eta beste musikari batzuei ere. “Hainbeste pertsona euren laguntza oparitzen ari direla ikustea pozgarria da”, esan zuen musikariak une hartan. Emanaldiekin batera, garai hartan hasiera eman zitzaion “We Are Like You” ekimenari buruzko azalpen bat ematen zen. 

Urte horretako bereko udazkenean kontzertu solidarioko bigarren itzuli bat abiarazi zuen.

2016an, gure ongile eta laguna bigarren emanaldi sorta solidario batean murgildu zen gure proiekturako dirua biltzeko, “Bihotzerako izarrak – Estrellas del corazón” izeneko disko berria kaleratzearekin batera. 

Oñatiko musikariaren heriotzaren albisteak atsekabe handia eragin du Euskal Herriko musikaren munduan, Juan Carlos oso ezaguna eta estimatua baitzen bertan.

Donostian, Madrilen, Pauen eta Erroman musikalki prestatua, musika instrumentaleko 30 disko baino gehiago eta antzerki, zinema eta telebista, orkestra eta bandetarako konposizio ugari utzi ditu gerorako. Berrizko, Galdakaoko, Mendaroko, Eskoriatzako, Zestoako, Zegamako, Orozkoko ereserkien egilea izan zen, baita Donostiako Zinemaldirako konposizioen eta euskararen aldeko ospakizunen egilea ere, hala nola Kilometroak edo Ibilaldia.

Juan Carlos organo-jotzaile titularra izan zen bere jaioterrian, Oñatin, eta orkestra-zuzendari gisa ibilbide oparoa egin zuen, talde hauen gidaritza eramanez: Bartzelonako Lizeoko Orkestra Sinfonikoa, Paueko Kontserbatorioko Orkestra, Erromako Santa Zezilia Akademiako Orkestra, Donostiako Schola Cantorum abesbatza edo Galdakaoko Zaletasuna abesbatza, edo Gasteizko, Zestoako, Getariako eta Galdakaoko musika-bandak, besteak beste.

Goian bego, Juan Carlos.