Sevillako Loyola Unibertsitatean, kalte zerebral baten ondoren sexu-osasunari buruz hitz egiten
Martxoaren 18an eta 19an, Psikologiako II. Jardunaldi Profesionalak egin dira Loyola Unibertsitatearen Sevillako campusean, psikologia kliniko-sanitarioaren hainbat espezialitate aztertzeko eta eztabaidatzeko. Programa psikologiatik eta esku hartzeko eredu desberdinetatik hainbat problematikatan eta trebetasun terapeutikoen garapenean sakontzeko diseinatu zen, baita lan arlo desberdinetan esku hartze psikologikorako beharrezkoak diren konpetentziak hobetzeko ere, horien artean egonik helduen zein haur eta gazteen ebaluazioa eta tratamendua, baita neuropsikologiaren eta adikzioen psikologiaren esparruetako esku hartze profesionala ere. Espainia osoko profesional entzutetsuak bildu ziren jardunaldietara, Loyola Unibertsitatean.
Loyola Unibertsitateko Psikologiako II. Jardunaldi Profesionalen partaideak hauek izan ziren: David Bisettok, Psikologiako doktoreak, substantzien erabilerak eragindako nahasmenduan Matrix programaz hitz egin zuen; Mabel Garcia, Psikologia Klinikoko psikologo espezialistak, psikoterapiarekiko atxikimenduan zentratu zen; Leandro Palaciosek, psikologo eta irakasleak, nahasmendu adiktiboen taldekako lanketari buruzko hitzaldia eman zuen; eta Adrian Pereak, ITA Acude Torre del Mar zentroko zuzendariak, elikadurako jokabidearen nahasmenduen esku hartze psikologikoa aurkeztu zuen. Hizlari taldearen parte gisa, Aita Menni Ahizpa Ospitalarioen Kalte Zerebralaren Zerbitzuko neuropsikologoak Ainhoa Espinosa de Luzarragak hitzaldia eman zuen: ‘Sexu osasunari laguntzea kalte zerebral baten ondoren. Ebaluazioa eta esku hartzea neuropsikologiatik’. Azkenik, Paloma Alvarez psikologo eta Biologia Molekular, Biomedikuntza eta Ikerketa Klinikoko doktoreak korronte zuzeneko estimulazio transkraniala (tDCS) neuropsikologian aplikatzeari buruzko masterclassa eman zuen.
Neuropsikologo lanetan egindako ibilbidean, hartutako kalte zerebrala lantzeko eta hori duten pertsonak tratatzeko lantalde batean, Ainhoa Espinosa de Luzarraga gabezia batez ohartu zen: pazienteek ez zuten jarraibiderik eta prestakuntzarik jasotzen sexu osasunari buruz. Hori dela eta, hainbat dinamika sortu zituen sexualitatearen inguruko edukiak Kalte Zerebraleko Eguneko Zentroko erabiltzaileekin, hor egiten baitu lan berak.
Gure adituaren hitzaldiak azpimarratu zuen kontuan hartu beharreko faktore bat psikofarmakoen albo ondorio posibleak direla. Nabarmendu zuenez, halaber, gizarteak, oro har, “sexualitate eredu oso estua du, genitalitatean ardaztua”, eta, pertsona guztien sexualitatea bermatuko duen eredu ireki eta inklusibo batera pasatzeko, “genitalei buruz hitz egin beharrean, gorputzei buruz hitz egingo duen eredu bat behar dugu, orgasmoari buruz hitz egin beharrean plazeraz hitz egingo duena”.
