Ikastaro berriarekin adikzioen prebentzioari buruzko hitzaldiei ekingo diegu berriro
Drogen inguruan dugun egoera eta ingurunea aztertuz, Amaia Bolumburu psikologo kliniko eta Errehabilitazio eta Dinamizazio Sozialeko Zerbitzuko koordinatzaileak eta Amaia Segovia begiraleak azaroaren 2an hasi zuten 2023/2024 ikasturte honetan adikzioen inguruan sentsibilizatzeko lehen tailer teoriko-praktikoa. Azpeitiko Iraurgi ikastetxeko batxilergoko 1. mailako berrogei ikaslek baino gehiagok gogoeta egin zuten gai hauei buruz: zein den drogak kontsumitzen hasteko adina, zein substantzia mota diren, zein lekutan kontsumitzen den, non lortzen diren toxiko horiek, zer lortu nahi duten kontsumitzean eta zerk eramaten duen jendea hori egitera.
Aita Menni Ospitaleko Nerabezaroko Mendekotasunen Prebentziorako Zerbitzuak urteak daramatza drogen kontsumoa prebenitzeko tailer praktikoak ematen. Saio horiek ikastetxeetako nerabeei eta gazte entitateei zuzenduta daude, eta mendekotasun-arazoak dituzten Adimen Osasuneko pazienteen lekukotza presentziala edo bideozkoa izaten dute.
Jakina, saioan zehar drogen kontsumoak dituen arriskuak eta ondorio negatiboak jorratu ziren, legezkoak zein legez kanpokoak, ahaztu gabe koma etilikoa, kalamu edo marihuana erretzearen ondoriozko flakia edo estimulatzaileen kontsumoak eragindako paranoiak. Ondorio fisiko eta psikologikoez hitz egin zen, baita drogak hartzen dituen pertsonaren eta haren ingurunearen bizitzan izan dezakeen eraginaz ere.
Profesionalek azpimarratu zuten nerabezaroan prebentzioa garaiz egitearen garrantzia; izan ere, drogen kontsumoak eta adikzioek eragindako nahasmenduak nabarmenagoak dira 15-16 urte bete aurretik hartzen hasten direnen artean.
Jardunaldia amaitzerakoan, ikasleek dinamika batean parte hartu zuten, eta ikasitakoa titular batean laburbildu zuten. «Begiratu zugatik eta ez begiratu besteei» edo «gertuko jendeari lagundu eta konbentzitu besteak kontsumitzea txarra dela» bezalako esaldiek bete zuten berariaz prestatutako panela.
Mendekotasunen prebentzioari buruzko hitzaldiak nola eskatu
Aita Menni Ospitaleak ikastetxeen eta gazte erakundeen eskura jartzen du zerbitzua berriz ere, eta espero du ekimena berriro hastearekin batera adikzioak eta horien ondorioak prebenitzen lagunduko dela. Eskatzeko 943 794411 telefonora deitu daiteke eta Ainhoa Cortabarriagatik galdetu, edo mezu bat idatzi: [email protected].
Aurreikusitako hurrengo tailerrak Beasaingo institutuko batxilergoko 2. mailako 60 ikaslerentzat (azaroaren 16an), Bergarako Ipintza institutuko DBHko 3. mailako 130 ikaslerentzat (3-4 saio) eta Azpeitiko Iraurgi ikastetxeko batxilergoko 2. mailako 45 ikaslerentzat izango dira.
Aita Menni Ospitaletik ikastetxe, guraso elkarte eta gazte erakunde guztiak animatzen ditugu adikzioei buruzko sentsibilizazio hitzaldiak eskatzera. Gogorarazten dugu nerabezaroan prebentzioa funtsezkoa dela.
Gainera, jarduerak bertaratutako neska-mutilekin beren esperientzia pertsonala partekatzen duten erabiltzaileen ahalduntzea sustatzen du.
