Horrela ospatu genuen San Benito Menni eta gure laguntzaileei egindako omenaldia
Apirileko azken astea ‘Aste Nagusia’ da Ahizpa Ospitalarien egutegian. Apirilaren 24an San Benito Menniren jaia ospatzen da, Aita Menni Ospitalearen eta Kongregazioaren sortzailea dena. Euskadiko zentro guztiek modu berezi batean ospatu dute data hori.
Logikoa denez, Arrasateko Aita Menni Ospitalean egin ziren ekintzarik garrantzitsuenak, eta han izan ziren ospakizun gehienak. Apirilaren 27an Donostiako apezpikuak, Jose Ignacio Munillak, Eukaristia egin zuen. Eliza paziente, lagun, laguntzaile eta ahizpez beterik zegoen. Komunitateko nagusiak, ahizpa Montse Esparzak, ongi etorria egin zien bertaratutako pertsona guztiei, eta adierazi zuen garapen-bide berri bat hasi dela Kongregaziorako, santuaren festarekin batera, Ahizpa Ospitalarien Espainia probintzia kanonikoki sortu berri delako.
Aita Menniren festan, ebanjelioa, homilia eta eskaerak egin zituzten -ez ziren falta izan errefuxiatuen eta Ekuadorreko lurrikararen biktimen erreferentziak-, eta aita sortzaileak itxaropenarekin zuen konpromisoarekin eta pertsona gaixoen eta ahaztutako pertsonen alde egindako errukizko lanarekin eta lan abegitsuarekin jarraitzea eskatu zuten.
Elkarrekin haziz
Meza amaitutakoan otamen txiki bat eskaini zen guztientzat kafetegian. Baina horren aurretik, Zuzendaritza Batzordeko kideek oroitzapenezko zenbait erloju banatu zizkieten zazpi laguntzaileei, nahiz eta gazteak izan, 25 urte daramatzatelako zentroan lanean: Charo Murillo, Fran Pinilla, Marilu Mateo, Maite Lazpiur, Alicia Larrazkueta, Zorion Lizundia eta Ana Santor (erlojua zuzenean jaso ezin izan zuen bakarra). “Zorte handia daukagu zuek bezalako laguntzaileak izatearekin”, esan zien ahizpa Monsek maitasunez. Zorionen ondoren eta txalo artean, omendutakoek beren hastapenak gogoratu zituzten. Ahizpa Nieves beteranoa aipatu zuten, erakundean “hartu” zituelako; ahizpei oro har ere eskerrak eman zizkieten, “urte hauetan pertsonak gisa hazten eta balioetan heltzen laguntzeagatik”.
Bazkariaren ondoren, mexikar festa bat egin zen, eta San Benito Menniren omenez egindako 2016ko Aste Santu honen egun nagusiarekin amaitzeko, galerian askari berezia egin zen. Festak Beasaingo Ezkiaga Errehabilitazio Psikosozialeko Zentroan jarraitu zuen, txokolatada eta akordeoi-musikarekin. Hurrengo egunean, auzoko Arrasateko San Joan Jainkoarenaren Ospitaleko zelaian joaneko futbol-partida egin zen: Arrasate-Santander, Aita Menni Ospitalearen eta Santanderreko Aita Menni Zentroaren artean. Aurten San Benito Menniren omenez egindako jarduera bereziekin amaitzeko, hilaren 29an, Beasaingo EPSZrn fotomosaikoa aurkeztu zuten, eta horrez gain, lunch bat egin zuten Arrasateko Eguneko Ospitalean.
