Gizarteratze zikloko ikasleek ekintzak egin dituzte gure adinekoekin
Txurdinagako Lanbide Heziketako Ikastetxe Integratuko Gizarteratzeko goi maila zikloko ikasleak hainbat egunetan etorri dira Txurdinagabarri Egoitzara, gure adinekoekin praktikak egitera.
Urtarrilaren 13tik 16ra, bi gazte talde etorri ziren 16:00etatik 17:00etara, eta beste bi talde 17:00etatik 18:00etara, eta, horrenbestez, bi jarduera egin ahal izan genituen aldi berean adinekoen bi talde desberdinekin.
Txurdinaga LHIIko lehen mailako neska-mutilak Gizarteratzeko Goi mailako Teknikari moduan ari dira prestatzen, pertsonen eta komunitatearen zerbitzuan lan egiteko, arlo hezitzailean, asistentzialean eta psiko-sozialean.
Esperientzia praktiko horiei esker, adinekoekin jarduera ludikoak, estimulazio kognitibokoak eta ariketa fisikokoak planifikatu, antolatu eta garatzen ikasten dute, eta ikasketetan barneratzen dituzten ezagutza teorikoak praktikan jartzen.
Adinekoentzat, gazteen presentzia nobedadea eta akuilua da, oso gustuko baitute jende berria ezagutzea eta horiekin egotea, eta bi taldeek asko ikasten dute elkarrengandik.
