Gaixotasun neurodegeneratiboen aurkako Estropatadan parte hartu dugu
Urriaren 1ean egin zen 2023ko Estropatada Bilbon, gaixotasun neurodegeneratiboen aurka borrokatzeko dirua biltzen duen urteroko ekitaldi jendetsua.
Txurdinagabarri Egoitzan, egoiliarrekin hitz egin genuen jarduera horri buruz, eta parte hartzea erabaki genuen. Horretarako, ibaiko lasterketan ahate bat izateko eskubidea ematen dizun txartel bat erosi behar da. Edo, hobeto esanda, “bioahate” bat, lehen 6 edizioetan ahateak gomazkoak baitziren, 2019 eta 2020an pinaburuekin ordezkatu ziren, eta 2021ean dagoeneko landare jatorriko materialez egindako ahateak erabiltzen hasi ziren. Lasterketaren egunean, “bioahate” guztiak itsasadarrera botatzen dira zubi batetik, eta korronteak mugitzen ditu, puntu jakin batera iritsi arte. Ahateek irrati maiztasuneko etiketa bat daramate, eta, aplikazio baten bidez, bakoitzak lasterketan duen posizioa jarrai daiteke telefono mugikor batekin. Lehen postuetan iristen diren ahateek sariak lortzen dituzte.
Irailaren 27an, egoiliar talde batekin joan ginen The Walk On Project (WOP) fundazioaren standera (Estropatada antolatzen duen fundazioa), txartelak erostera. Bost ahate erosi genituen, bat solairu bakoitzeko, baina txartel bat edo beste ere erosi genuen bakoitzak bere kabuz, gaixotasun neurodegeneratiboen aurkako borrokan laguntzeko. Gainera, Bilboko erdigunetik paseo bat eman eta kafetegi batean zerbait hartzeko aprobetxatu genuen.
Lasterketaren egunean ez zen zorterik izan. Bideoan ikusi genuen itsasadarreko lasterketa nola zihoan, baina gure ahateak ez ziren bereziki azkarrak izan eta ezin izan genuen saririk lortu. Hala ere, gure txartelek garai batekoen antzeko gomazko ahate batzuk jasotzeko eskubidea ematen ziguten, oroigarri gisa, eta azaroaren 14an Deustura hurbildu ginen, The Walk On Project dendara, eta han eman zizkiguten gure ahateak, orain Egoitzan gure artean daudenak.
