Egonaldia Arantzazun Elkarrekin Bila gizarte-proiektuari esker
Aita Menni Ospitaleko 20 pazienteko talde batek hiru egun eman zituen fraide frantziskotarren ostatuan.
Egonaldia santutegian: hiru egun, bi gau. Ospitaleko hogei bat pazientez osatutako talde batek ibilaldi bat egin zuen joan den astean Arantzazura Elkarrekin Bila proiektuan parte hartzeko. Fraide frantziskotarren ostatuan eman zuten gaua, eta hortik zenbait irteera egin zituzten egun bakoitzean. Horitako batean Gomiztegi baserrira joan ziren, gaztak nola egiten dituzten ikusteko. Oñatitik egindako ibilaldian txokolatea nola egiten den ikusi zuten, Bidaurretako eliza…Programaren barruan, Aizkorri-Aratz parketxean eta Arrikrutzeko kobetan ere egon ziren.
Elkarrekin Bila Arantzazuko aita frantziskotarrek pertsona laikoz osatutako talde batekin batera bultzatzen duten ekimen solidarioa da. Helburua da bizitza bizitzan zailtasun handiagoak dituztenei (gaixoei, mendekotasun edo desgaitasun bat dutenei, adingabeei…) egonaldi bat ematea santutegian. Egonaldian aisialdi aukerak eta prestakuntza ematen dizkiete. Egunerokotasuneko gauzetatik atereaz, Elkarrekin Bila proiektuak bizitzeko beste modu bat erakusten die, “pertsonak gisa haz daitezen, eta barruko konfiantza berrituarekin, izaten dituzten zailtasunei aurre egiteko bideak eta aukerak ikus ditzaten”.
Aita Mennitik eskerrak eman nahi dizkiegu gizarte-arloko proiektu polit honetan parte hartzeko aukera eman diguten aita frantziskotarrei.
