Egoitzetako 140 profesionalek formakuntza jaso dute Aldundiaren eta Aita Menniren eskutik
Gipuzkoako Foru Aldundiak COVID-19aren prebentzioari eta kontrolari buruzko formakuntza-jardunaldi berri bat antolatu du. Aita Menniko profesionalek eman dute, eta Gipuzkoako adinekoen 65 egoitzei zuzenduta egon da. Guztira, 140 profesionalek hartu dute parte, egoitza-zentro bakoitzeko Infekzioaren Prebentzioko eta Kontroleko arduradunek eta zuzendaritzako kideek. “Horrela, egoitzetako profesional guztiengana iristen jarraitzea bilatzen dugu, prestatzaileen prestakuntza baita; eta, bide horretan, prebentzioan sakontzen jarraitzen dugu”, esan du Maite Peñak, Gizarte Politikako diputatuak.
Lehen formakuntza saioak apirilean eman ziren, eta ordutik, Peñak gogorarazi duenez, “Formakuntza Plana indartu egin dugu eta prestakuntza saioak areagotu eta dibertsifikatu egin dira”. “Helburua zentroetan COVID-19aren prebentzioan, kontrolean eta erabileran ezagutza sakontzea eta sendotzea da, eta Gipuzkoako zerbitzu eta baliabide sozialetako langile guztiengana modu mailakatuan iristeko moduan diseinatu dugu”, gaineratu du.
Irailean, Osasun Saileko eta Mugarik Gabeko Medikuen erakundean ibilbide luzea izan duen Carmen Ramírez de la Piscina doktoreak emandako saioa, Aldundiko, DYAko, Kabiako eta Aita Menniko profesionalei zuzenduta egon zen. Profesional horiek diziplina anitzeko taldeak osatzen dituzte, eta aldian-aldian zentroetara joaten dira ikuskapen eta aholkularitza teknikoko lanak egitera, baita PCR probak egitera ere. Prebentzioari, kontrolari eta COVID-19 agertokien erabilerari buruzko prestakuntza hori Aita Menniko profesionalen eskutik iritsi da gaur adinekoen egoitza guztietara, zehazki, zentro bakoitzeko PCIko arduradunengana.
“Gaurko saioarekin beste urrats bat eman dugu COVID-19ak eragindako infekzioa prebenitzeko eta kontrolatzeko neurrien zabalkundean sakonduz. Aktibo dugun Zaintza eta Alerta Sisteman sakontzen jarraitzen dugu, zentro bakoitzeko egoera monitorizatzeko eta, horrela, une bakoitzean beharrezko neurriak hartzeko”, nabarmendu du diputatuak. Ildo horretan, formakuntza COVID-19ari aurre egiten jarraitzeko “funtsezko” elementua dela esan du. “Formakuntza Plana elementu bizia da, eta une bakoitzean behar diren behar eta eskaerekin osatzen jarraituko dugu”, gaineratu du Maite Peñak, eta “COVID-19aren testuinguruan prestakuntzan sakontzeak duen garrantzia” azpimarratu du, “oso aldakorra eta ziurgabetasun handikoa dena”.
