Disfagiari buruzko jardunaldia Aita Mennin, segurtasun arrisku gisa

Abenduaren 20an, Aita Menni Ospitaleko 44 profesional joan ziren ikasgelan Pazientearen Segurtasunari buruz antolatutako jardunaldira: ‘Disfagia, segurtasun arriskua’. «Topaketan, irensteko zailtasunak dituzten pazienteak nola detektatu eta ebaluatu eta esku hartzea planifikatu azaltzeko AMOko bertako Disfagia Taldeak berak egindako lanaren aurkezpena egin zen», kontatzen digu gure Erizaintzako zuzendari Nerea Gutierrezek.

Aita Menni Ahizpa Ospitalarioen zuzendari gerente Mikel Tellaechek eta Nerea Gutierrezek ongietorria egin ondoren, jardunaldia hasi zen, Pazientearen Segurtasuneko arduradun Susana Fernandez-Mongek Aita Menniko Pazientearen Segurtasun Estrategiaren 2023ko Ebaluazioari buruz emandako azalpenarekin.

«Disfagia, pazientearen segurtasun arrisku gisa» izan zen eztabaida mahaiaren gai nagusia, irensketa normala eta horren nahasmenduak jorratuz, eta gure ospitaleko bi doktorek parte hartu zuten: Imanol Arevalo, errehabilitazioko medikua, eta Rafael Calbeto, barne medikuntzako medikua. Ondoren, Alisa Bianca Lacatus erizainak irensketaren balorazioari eta erregistroari buruz duen esperientzia partekatu zuen, eta ondoren Manuel Bermudez gure Kalte Zerebraleko Unitateko logopedari eman zion hitza, zeinak ‘Irensketaren nahasmenduen zainketen planifikazioa’ izan zuen mintzagai.

Atsedenaldiaren ondoren, erizainei zuzendutako tailer praktiko bat egin zen, irensketaren balorazio funtzionalari buruz, Pere Clave doktoreak eta haren taldeak irensketaren ebaluazio klinikoa egiteko garatu duten MEC-V metodoan oinarrituta, zeina 3 biskositateko elikagai bolo administratuz egiten den (nektarra, likidoa eta pudina). Tailerra gure zentroko Ane Aizpuru eta Manuel Bermudez logopedek zuzendu zuten.

Jardunaldian disfagia lantzearen garrantzia nabarmendu zen, ospitale eremuan pazientearen segurtasunerako arrisku gisa. Ezagutzak eta praktika optimoak trukatzeko horrelako ekimenek indartu egiten dute gure pazienteen arretaren kalitatea eta segurtasuna etengabe hobetzeko dugun konpromisoa.

Disfagiari buruz

Disfagia irensketa prozesuaren nahasmendu bat da, elikagaia/listua ahotik urdailera behar bezala pasatzea zailtzen duena. Disfagia duten pazienteek irensketaren eraginkortasuna eta segurtasuna kaltetuta izan ditzakete, eta, horren ondorioz, desnutrizio eta deshidratazio koadroak eta arnas infekzioak (xurgapen pneumonia) eta eztarrian trabatzea ager daitezke.

SEMERGEN-Lehen mailako Arretako Medikuen Espainiako Elkartearen arabera, disfagiaren garrantzia alderdi hauetan datza: prebalentzia, instituzionalizatu gabeko 4 adinekotik 1i eta instituzionalizatutako 5etik 4ri eragiten baitie; kalitate funtzionalean eragiten duen inpaktu handia, eta berari lotutako hilkortasun tasa handia. Zifra horiek gorabehera, disfagia infradiagnostikatuta egon ohi da.

Aita Menni Ospitalean uste dugu garrantzitsua dela irensketaren nahasmendu hori detektatzea eta ekitea, artatzen ditugun pazienteen bizi kalitatea hobetzeko eta haren ondorioak saihesteko

Informazio gehiago