Bertso arratsaldea Barandiaran Egoitzan
Joan den abenduaren 2an, Durangoko Joxe Miel Barandiaran Egoitzak esperientzia paregabe baten agertokia izan zen ‘Bertso Ardatz’ proiektu soziokulturalaren baitan, Bizkaiko Foru Aldundiko Euskara, Kultura eta Kirol Sailak sustatuta, Gizarte Ekintza Sailarekin lankidetzan. Bertsolaritzaren bidez adinekoen bizi kalitatea hobetzea helburu duen ekimenak bi bertsolari nabarmen hurbildu zituen egoiliarrengana: Nerea Ibarzabal eta Ander Elortegi.
Jardunaldian, umorez, emozioz eta erreferentzia kulturalez betetako inprobisazioez gozatu ahal izan genuen, gure iraganarekin eta nortasun kulturalarekin zuzenean konektatuz. Emanaldiak, entretenitu ez ezik, oroitzapen zoriontsuak ere ekarri zituen gogora, gure aldartea indartu zuen eta gure egoiliarren gaitasun kognitiboak estimulatu zituen. Txapelketa eta emanaldietan egindako ibilbideagatik ezagunak diren bertsolarien hurbiltasunak une ahaztezin bihurtu zuen arratsaldea.
Bertan izan ziren, halaber, Euskara, Kultura eta Kiroleko foru diputatua, Leixuri Arrizabalaga, eta Gizarte Ekintzakoa, Amaia Antxustegi.
Egoiliarrak, partaideak eta protagonistak
‘Bertso Ardatz’ proiektuak adinekoen ongizate psikoemozionala hobetzeko tresna ahaltsua dela erakutsi du. Jarduerak parte hartzaileen autoestimua indartzeko eta kidetza sentimendua sortzeko bertutea du, eta horiek zahartze aktiboan funtsezko elementuak dira.
Bertsolarioi eskertu nahi dizuegu zuen inprobisazioetan sartzeagatik, esperientzia hain berezi honen parte aktibo sentiarazteagatik. Ez dugu une hau ahaztuko, ez bakarrik berria eta dibertigarria delako, baita gure kultura bultzatzen duelako ere, gu partaide eta protagonista eginez. Ilusioz espero dugu hurrengo aukera bat egotea, eta hori gustura ospatuko genuke Bertso Bazkari batekin, gure tradizioen inguruko une ahaztezin gehiago partekatzeko.
