Arrasateko EPSZ ‘Puro Relajo’-ren kontzertuan izan zen

Hainbat ezaugarrik osatzen dute pertsonen bizitza: eguneroko bizitzako oinarrizko jarduerek eta jarduera instrumentalek, lanak… Aisia eta denbora librea ere bizitzako parte dira, eta gainerakoak bezain ezaugarri garrantzitsuak, gainera; izan ere, aisiako jarduerak maila fisiko, emozional eta psikikoko ihesbideak dira, eta aberastu egiten dituzte gizarte sareak. Ongizatea lortzeko, ezinbestekoa da alderdi horien guztien artean oreka lortzea, elkarren artean lotuta baitaude eta batak eragina baitu besteengan.

Nahasmendu mental larria duten pertsonek denbora libre asko izaten dute, nahiz eta ez duten denbora hori baliatzen jarduera atsegingarri, garrantzitsu eta autonomoak egiteko. Kolektibo honek maiz izaten du interes galera edo beherakada, bai eta esperientzia berriak izateko aukera gabezia ere. Ez dute parte hartzen, ezta ere, komunitateko aisia baliabideetan, eta, azkenerako, gizartean bakarturik egoten dira; besteak beste, gaixotasunak berezkoa duen sintomatologia negatiboak edo gizarteratzeko dituzten zailtasunek bultzatuta. Horregatik, Aita Menniren Errehabilitazio Psikosozialeko Zentroek aisiarako eta denbora librerako egitarau bat daukate, interesak identifikatzeko, bilaketa errazteko eta ahalik eta bizimodu normalizatu eta autonomoena ekarriko dieten errehabilitazioa eta gizarteratzea bultzatuko duten jarduerez goza dezaten, komunitateko baliabideak erabiliz. Bestalde, komunitatean jarduera bat egiteak dagoen estigma soziala murrizten laguntzen du. Izan ere, kolektibo honi buruzko informazio gabezia eta haiekin esperientziarik ez izatea dira gizarteratzea, harreman sozialak eta komunitatean parte hartzea mugatzeko aldagai nagusiak.

EPSZn gauzatzen diren jardueren artean, nabarmentzekoa da musika tailerra, non lan okupazionaleko hainbat ezaugarri lantzen diren (kognitiboak, sentsoriomotorrak, psikologikoak…). Jendeak oso gogokoa duen musika generoetako bat rantxerak dira. Beraz, gure lantaldeak pentsatu zuen aukera polita litzatekeela ‘Puro Relajo’ taldeak auzoko jaietan eman behar zuen kontzertura irteera egitea.

Kontzertuaren aurretik, taldeko kideak ezagutzeko aukera izan genuen, eta kontzertuan, abesti bat eskaini ziguten. Zentroko eskulan jardueretan, berriz, oparitxo batzuk prestatu genizkien, eskerrak emateko.

Esan dezakegu oso esperientzia positiboa izan zela guztiontzat, eta hala dela ikus dezakegu, lekukotza hauen bitartez:

– “Denbora asko igaro dut une honen zain; izan ere, izugarri gustatzen zaizkit rantxerak, eta aurretik sekula egon gabea nintzen era honetako musika jotzen duten kontzertu batean”. J.G.

– “Musika oso erlaxagarria zen. Nire familia etorri zitzaidan gogora… Asko eskertzen diet eskaini ziguten une goxoa. Ea errepikatzen den! Merezi du eta!”. J.U.

– “Oso gustura egon nintzen. Primeran jo zuten, eta pare bat abestitan asko hunkitu nintzen, ia negar egiteraino. Nire lagunekin eta gurekin etorri ziren zentroko profesionalekin kantuan eta dantzan aritu nintzen, ederki! Puro Relajo taldekoak atseginak eta adeitsuak iruditu zitzaizkidan”. S.M.

“Musika talde batekin harremana dudan lehen aldia da. Ezin hobeto pasa nuen, benetan gustura, eta errepikatzeko prest nago”. A.A.

“Haur baten pare sentitu nintzen. Errepikatzea gustatuko litzaidake, ez baita edonolako taldea. Gora Relajoko kideak!”. K.I.

Baina… Nor dira Puro Relajo taldekoak?

Puro Relajo (mexikar esamoldea da, “festa garaia” edo pareko zerbait esan nahi duena), Oibarko (Nafarroa) musika talde bat da. 2013an sortu zen, eta kantu ugariren bertsioak egiten dituzte: rantxerak, tex-mex, bai eta euskal kanta klasikoak ere. Honako hauek osatzen dute taldea: Txuma Gallués (akordeoia eta ahotsa), David García (ahotsa eta baxua), Jorge García (gitarra eta ahotsa), eta Iosu Burguete (koruak eta ahotsa) eta Eneko Irigoien tronpeta jotzaileak. Taldeak, bere ibilbidean zehar, sei CD grabatu, eta ehunka kontzertu eman ditu. 

Eskerrak eman nahiko genizkioke Puro Relajo taldeari, EPSZra datozen pertsonen errehabilitazio prozesuan laguntzeagatik. Eta eskerrik asko, halaber, Ana Ibarrolari, bere lankidetzari esker, ekimena egia bihurtu ahal izan baikenuen. Eskerrik asko, bihotzez! Ziur gaude beste kontzertu batzuetan ere elkar ikusiko dugula.