Gure zentro guztietako ordezkariek itxi dituzte 125. urteurreneko ekitaldiak Aita Menni Ospitalean
Urte osoan oroitzapen jarduera ugari egin ondoren, hilaren 13an amaitutzat jo ziren Santa Ageda Osasun Etxea sortu zeneko 125. urteurrena ospatzeko ekitaldiak, zeina 80ko hamarkadan sortu zen Aita Menni Ospitalearen hazia izango zen.
Une horretarako, Gipuzkoako eta Bizkaiko Ahizpa Ospitalarioen zentroetako laguntzaile ugari joan ziren Gesalibarrera (Arrasate), eta gure Komunitateko bost ahizpekin, Aita Menni Ahizpa Ospitalarioen Zuzendaritza Kontseiluarekin eta paziente talde zabal batekin bildu ziren Ospitaleko elizan egindako eukaristiara; meza Donostiako Elizbarrutiko bikario orokor Mikel Arangurenek eta Ospitaleko parroko Horacio Argaratek eman zuten.
Bai Mikel Arangurenek bere homilian bai Aita Menni Ahizpa Ospitalarioetako nagusi Sor Isabel Martinezek aurretiaz eman zuen hitzaldian, San Benito Mennik Kongregazioaren eta Ospitalearen sortzaile gisa izan zuen zeregina gogoratu zuten, eta pertsona behartsuenei arreta emateko laguntzaileek egiten duten lanaren garrantzia nabarmendu zuten.
Hitzaren liturgiaren ondoren, pazienteek, laguntzaileek eta boluntarioek beren eskaintzak aurkeztu zituzten, Ahizpa Ospitalarioen lana garatzen duten zentro eta laguntza lerro guztiak sinbolizatuz: psikiatria eta osasun mentala, ezintasun intelektuala, kalte zerebrala, adineko pertsonak eta desgaitasunerako laguntza teknikoak. Erdiko korridorea zeharkatu zuten aldarerantz 125. urteurreneko logotipoa, pazienteek egindako lore sorta, Aita Menni Ahizpa Ospitalarioetako ama nagusien talde baten irudiak zituen koadro bat eta kriseilu bat piztuta eramanez, aldarean geratu zirenak eukaristia amaitu arte.
Aurresku batek eman zuen agurra, eta ondoren, ahizpak eta laguntzaileak San Benito Menniren bustoaren inguruan kokatu ziren, oroimenerako posatuz, eta Aita Menni Ahizpa Ospitalarioen talde osoa ordezkatuz, gure Erakundearentzat hain garrantzitsua izan den ospakizunaren amaieran, Euskal Herrian jardunean hasi zenetik 125. urte bete direnean.
Ondoren, talde osoak aperitibo bat partekatu zuen Ospitaleko kafetegian.
