Aita Menniko psikologo profesionalek terapia kontestualei buruzko ezagutza eguneratu dute
Aita Menni Ahizpa Ospitalarioen hainbat dispositibotan lan egiten duten 18 psikologo profesionalek eta Deustuko Unibertsitateko Osasun Master Orokorreko 8 ikaslek onarpen eta konpromiso terapiari buruzko mintegi trinko batean parte hartu dute. ACT akronimoaz ezagutzen da, ingelesez Acceptance and Commitment Therapy, eta Aita Menni Ospitalean izan da. Prestakuntza Psikologiako doktore eta Oviedoko Unibertsitateko irakasle titular Ana Maria Gonzalez Menendezek eman du, eta terapia horri buruzko ezagutzak berritzera zuzendu zen, zeina eredu terapeutiko kognitibo eta konduktualen hirugarren belaunaldia delakoaren parte baita.
ACT metodoak onarpen eta mindfulness printzipioak (kontziente egotea, hemen eta orain) eta portaera aldatzeko estrategiak uztartzen ditu. Urriaren 18an eta 19an Arrasateko Aita Menni Ospitaleko berrikuntza aretoan egindako ikastaroaren helburua hainbat teknika indartzea da, gure profesionalen taldeak pazienteei lagundu ahal izan diezaien emozio zailak onartzen eta ongizatea hobetzeko ekintzekin konprometitzen.
Ana Maria Gonzalez Menendez doktorea Oviedoko Unibertsitateko Psikologia Fakultateko Nortasun, ebaluazio eta tratamendu psikologikoaren arloko kidea da, eta psikosia prebenitzeko programako ikerketa taldeko kide da.
Onarpen eta konpromiso terapia (ACT)
Irakasleak hirugarren belaunaldiko terapien bilakaeraz, ekarpenez eta berezitasunez hitz egin zuen, aurreko ikuspegiekiko duten aldea azpimarratuz. Terapia kognitibo-konduktualari buruzko berrikuntzak jorratu zituen eta, horien artean, ACTaren kogaratzaile Steven C. Hayesen ‘Sal de tu mente, entra en tu vida’ argitalpena ekarri zuen gogora, eta arazo psikologikoak ez direla gaixotasunak nabarmendu zuen.
Ikastaroan, terapiaren prozesu nagusiak landu ziren, bereziki onarpena eta ekintza. Prestakuntzak printzipio horiek finkatzeko ariketa praktikoak ere izan zituen, eta ACT terapia kasu praktiko batean aplikatu zen, nahasmendu obsesibo konpultsiboko kasu batean. Halaber, tailerraren zati batean terapia mota hau taldeko formatu batera nola eraman aztertu zen, testuinguru horretan sor daitezkeen zailtasunak alde batera utzi gabe. Gainera, ACTaren eta beste korronte terapeutiko batzuen arteko antzekotasunak esploratzeko denbora egon zen, eta horrek esku hartzeko metodo horren ikuspegi konparatibo bat izatea eta integrazioa hobeto ulertzea ahalbidetu zuen. Azkenik, irakasleak terapia dialektiko-konduktualari buruzko sarrera bat eskaini zuen; hirugarren belaunaldiko beste terapia bat da, eta ACTarekiko loturak eta desberdintasunak azpimarratu zituen.
Bertaratutako taldeak oso interesgarritzat jo zuen ikastaroa, eta Gonzalez Menendez doktorearen ezagutza eta komunikatzeko gaitasun bikaina baloratu zituen.
Prestakuntza trinko eta parte hartzaile honek –joan den irailean lehen laguntza psikologikoei buruz eskainitakoa bezala– Aita Menni Ospitaleko psikologo profesionalen taldearen gaitasunak indartu ditu, eta Psikologia Departamentuko arduradun Ana I. Dominguez Panchonek koordinatu du.
