Aita Mennik, Bidelagunek eta El Arbolek Turkia eta Siriarako arropa jasoko dute Durangon

Aita Mennik, Bidelagun eta El Arbol elkarteekin batera, Durangon arropa biltzeko premiazko kanpaina hasiko du, otsailaren 20tik, astelehena, 24ra, ostirala, Turkiako eta Siriako lurrikarek kaltetutako milaka lagunentzat.

Kanpaina horretan lagundu nahi duten guztiek Francisco Ibarra kaleko 24 zenbakiaren ondoan dagoen lonja batean utzi ahal izango dituzte beren ekarpenak, 18:00etatik 20:30era, aipatutako egunetan.

Aita Menniko Elkartasun arduradun Egoitz Zabala eta beste bi elkarteen bozeramaile Argi Elexpe azaldu dutenez, “bilduko den eta behar den arropa dira lo zakuak, jakak, neguko oinetakoak eta barruko arropak. Edozein neurritakoak”. “Ura gordetzeko ontziak erosteko ekarpen ekonomikoak ere egin ahal izango dira. Herritar guztiak kanpaina honekin bat egitera eta lankidetzan aritzera animatzen ditugu. Aldez aurretik eskerrak ematen dizkiegu”, adierazi dute.

Lurrikarek kaltetutakoentzako kanpainak

Aita Mennik lurrikarek kaltetutako pertsonei laguntzeko abian jarri duen bigarren kanpaina da. 10 egunez, Zaporeakekin batera, elikagaiak jaso ditu Arrasateko egoitzan.