Aita Menni Ospitalearen presentzia handia Psikiatria Pribatuko XIV. Biltzar Nazionalean

“Aldaketa soziala, Psikiatria eta covida’ lemapean, urriaren 14tik 16ra, Espainiako Psikiatria Pribatuko Elkarteak (ASEPP) bere XIV. Biltzarra egin du Bilboko Sociedad Bilbainaren egoitza sozialean. Topaketan Aita Menni Ospitaleko profesional ugarik parte hartu dute, batzuk psikiatriaren arlokoak, eta baita ere beste arlo batzuetakoak, hala nola psikologia, erizaintza edo gizarte lanekoak. Iñaki Madariaga Zamalloa doktoreak, gure Lege Psikiatriako unitateko arduradunak, eta Manuel Martin Carrasco doktoreak, gure ospitaleko zuzendari medikoak, partaidetza aktiboa izan zuten eta antolamendu batzordeko kide izan ziren.

“Hori bezalako biltzarretara joatea oso garrantzitsua da, ezagutzak eguneratzea eta gaurkotzea baitakar”, nabarmendu zuen Aita Menniko psikiatra Eglee Castillok, eta eskerrak eman zituen topaketa ospitaleko kideekin partekatu ahal izateagatik. Izaskun Arrese gizarte langilearentzat, berriz, psikiatriako biltzar batera joan ahal izatea aberasgarria da, eta ez da gauza arraroa, “egunero zuzenean bizi dugun errealitatea baita”. Eva Cobos erizainak berretsi zuen oso interesgarria iruditu zaiola entzutea, oro har, paziente psikotikoa oso ondo egokitu dela pandemiara, gure ospitalean gertatu den bezala. 

Pandemia, inflexio puntu gisa

2007tik, ASEPPek psikiatria pribatuko profesionalen talde baten ekimenak bideratzen ditu, onura komuneko esparruetan elkarrekin lan egiteko, eta urtero biltzar bat egiten du. 2021 honetan, osasun gomendioak betetzeko, parte hartu duten psikiatren kopurua murriztu da. 

Hizlari, diskurtso emaile, moderatzaile eta abarretan aritu ziren Psikiatriako espezialistek koronabirusak osasun mentalaren arloan izan ditzakeen ondorioak baloratu zituzten. Antolatzaileek osasun krisi honek ematen digun aukera nabarmendu zuten, “eta ondorio asko atera behar ditugu, ondoren aldaketak ekarri behar dituztenak”. Hain zuzen ere, ondorioetara iristeko, hausnarketa asko egin behar da. Eta horretan saiatu zen ASEPPen XIV. Biltzarra. Programak hainbat alderdi sakondu zituen, Psikiatriak egin dezakeen ekarpenaren perspektiba desberdinak proposatuz, beste sektore batzuetatik etor daitezkeenak osatzea baztertu gabe.

COVID-19ak eragindako pandemia inflexio eta aldaketa puntua izan daiteke gure bizimoduaren alderdi askotan. Kontsulta psikiatrikoetatik igaro direnen artean daude gaitzaren biktimen dolua sufritu dutenak, ondorenak, kutsatzeko beldurrak eta itomena, ezintasun sentsazioa, gaizki bideratutako oldakortasuna, tristezia sentimendu egundokoak, ziurgabetasun sozial eta ekonomikoaren ondoeza sentitu dituztenak. “Baina baita ere aurreko patologiak larriagotzea edo horien aldaketa nosomorfologikoa sufritu  dutenak”, gogorarazi zuen ASEPPeko lehendakari Juan Luis Mendivilek. Pazienteak bezala, baita osasuneko profesional ugari ere, bizitzea egokitu zaigun garai gatazkatsu honetan protagonista izan direnak tea direnak.

Ospe handiko hizlariak

Biltzarrak iraun duen hiru egunetan, ospe handiko hizlariek prestakuntza tailerrak eman zituzten izaera praktikoko hainbat edukiri buruz. Biltzarreko lehen ponentzia hilaren 14an egin zen, osteguna, eta Nestor Szerman doktorearen (Madril) ponentziari buruzkoa izan zen: “Psikoterapia eta substantzia toxikoen abusu koadroen tratamendua pandemian zehar”. Ondoren, psikosiaren arretaren arazoa landu zen; psikiatria publikoak eta pribatuak pandemian zehar eman duen arreta, horri buruzko eztabaida interesgarri batekin; bereziki haurrei eta nerabeei zuzendutako zaintza arreta defizitaren eta hiperaktibitatearen nahasmenduetan, pandemian zehar ere. Tailerren esparruan, pandemia garaietan gaixotasun mentalari buruzko ikerketa landu zuena nabarmendu zen. 

Halaber, oso harrera ona izan zuten Arumi doktorearen hitz testimonialak: Bartzelonako psikiatra delarik, covid paziente gisa izan duen esperientzia kontatu zuen, gaitzaren ondorioz lau hilabete egon behar izan baitzen ospitaleko ZIU batean, bizia arrisku larrian zuelarik. Ondoren, La Palmako Ospitale Zentraleko Psikiatria Zerbitzuko buru Felix Andres Gonzalezek uhartean sumendiarekin dagoen egoerak herritarren osasun mentalaren esparruan izan ditzakeen ondorioak azaldu zituen. 

Eta ezin German Barrios irakaslearen klausura hitzaldia aipatu gabe amaitu (Cambridgeko Unibertsitateko Psikiatriako katedradun emeritua da, oso ezaguna nazioarteko psikiatrian, eta gure ospitalearen oso hurbilekoa). Berak eman zion amaiera jardunaldiari, osasun mentalaren gaur egungo panoramaren eta mugen aurkezpen batekin, hori guztia neuropsikiatra eta filosofo eta historialaria den aldetik duen perspektiba ezagunetik.

Presentzia instituzionala Jose Luis Quintas doktoreari egokitu zitzaion (Eusko Jaurlaritzako Osasun sailburuordea), eta bere iritziz Eusko Jaurlaritzaren Osasun Sailaren zeregina zain izan den azaldu zuen, pandemian zehar osasun mentalaren arloan herritarrei arreta emateari dagokionez.

Urriaren 16an, larunbata, amaitu zen biltzarra, ASEPPen batzar nagusia egin eta gero, Luis Caballeroren‘Un regalo de Julia’ liburuaren aurkezpenarekin; aurkezpenean Madariaga doktorea moderatzaile aritu zen, eta XIX. eta XX. mendeetako histeriaren eta hipnosiaren harremana landu zen, perspektiba historiko batetik.