Fidmag – Ahizpa Ospitalarioak, nahasmendu bipolarrari buruzko ikerketa berri batean partaide
Haurtzaroan eta nerabezaroan aurkako egoerak bizi izan direnean gertatzen da DDR1 genearen alterazio epigenetikoa, eta nahasmendu bipolarraren agerpenari lotuta dago. Ondorio horretara iritsi da Cibersam-eko Institut d ‘Investigació Sanitària Pere Virgili (IISPV) taldeko ikertzaile talde bat, Institut Pere Mata Unibertsitate Ospitaleko eta Rovira i Virgili Unibertsitateko profesionalekin batera, non Cibersameko beste bi ikerketa taldek parte hartu duten: Fidmag–Ahizpa Ospitalarioetako Edith Pomarol-Clotet doktoreak gidatutako taldea, eta Bartzelonako Hospital Cliniceko Eduard Vietak gidatutakoa.
Alterazio epigenetikoak organismoak bizitzan zehar jasaten duen berezko eraldaketak diren arren, maizago gertatzen dira aurkako egoerak jasan behar izateagatik pertsona etengabe estres egoera baten mende dagoenean, hala nola abusu fisikoak, tratu txar emozionalak edo oinarrizko zainketen zabarkeria jasaten dituenean. DDR1 gene bat da, bere funtzioa garuneko zelula garrantzitsuenetako batean betetzen duena: oligodendrozitoak. Neuronak mielinarekin estaltzeaz arduratzen diren zelulak dira –lipidoz osatutako geruza bat da–, eta informazioa azkarrago eta eraginkorrago transmititzen laguntzen dute.
Molecular Psychiatry aldizkarian argitaratutako Bipogent azterlanaren emaitzei esker, etorkizunean, DDR1 genearen larritasuna nahasmendu bipolarra duen pazienteari odol analisi bat eginez zehaztu ahal izango da. Horrek patologia horretarako tratamenduak nabarmen hobetzen lagunduko du, eraginkorragoak eta pertsonalizatuagoak izan daitezen. Baina, horretarako, ikertzaileek gogorarazi dute lortutako emaitzak beste ikerketa eta lagin desberdinekin kontrastatu behar direla.
Nahasmendu bipolarraren eragileak ulertzea
Alterazio epigenetiko hori identifikatu izana mundu osoko ikertzaileek egindako antzeko aurkikuntzei gehitu behar zaie, eta inflexio puntua izan daitezke gaixotasunaren eragileak eta aurre egiteko moduak ulertzeko. Aurretik, egiaztatuta zegoen gaixotasun mentalen eragile nagusietako bat –nahasmendu bipolarrean, adibidez– aipatutako bizipenak jasateak dakarren higadura dela.
Oraingo ikerketa hau egiteko, nahasmendu bipolarreko diagnostikoa duten 128 pertsona helduk eta gaixotasun mentalik gabeko 141 pertsonak parte hartu dute. Egileek pertsona horien jarraipena egin zuten, ebaluazio kliniko eta psikologikoekin eta odol laginen analisiarekin.
“Parte hartzaile horien aldez aurreko jarrera ona eta eskuzabaltasuna izan gabe, azterketa ezinezkoa zatekeen”, dio Elisabet Vilella doktoreak, IISPVko Psikiatriako Genetika eta Inguruneko Ikerketa Taldeko arduradun eta ikerketaren liderrak, zeinean halaber parte hartu duten Cibersameko bi ikerketa taldek ere: Edith Pomarol-Clotet doktoreak gidatutako taldea, Fidmag-Ahizpa Ospitalarioetakoa; eta Eduard Vieta doktorea buru duen taldea, Bartzelonako Hospital Clinicekoa.
